Andijonda 7 nafar qiz ko‘chada janjallashdi
Holat bo‘yicha viloyat IIB maʼlumot berdi.
Ijtimoiy tarmoqlarda Andijon viloyatining Paxtaobod tumanida qizlar o‘rtasida janjal yuz berganligi aks etgan video tarqaldi. Holat yuzasidan viloyat IIB axborot xizmati maʼlumot berdi.
Holat joriy yilning 7 dekabr kuni soat 13:00 larda Paxtaobod tumani “Muazzimboy” MFY hududida joylashgan “Gumbaz” oshxonasi oldida sodir bo‘lgan. Shu tumaning “Qashqar” MFYda yashovchi 3 nafar opa-singillar M.N, M.I va M.A.lar hamda ularga oldindan tanish bo‘lgan “Navro‘z” MFYda yashovchi fuqarolar S.S va S.Yu.lar o‘rtasida janjal yuzaga kelgan. Janjalning kelib chiqishiga M.N tomonidan S.Yu.ga haqoratli so‘zlarning aytilgani sabab bo‘lgan.
Mazkur holat yuzasidan Paxtaobod tumani IIB xodimlari tomonidan ushbu fuqarolarga nisbatan Maʼmuriy javobgarlik to‘g‘risidagi kodeksning 183-moddasi (Mayda bezorilik) tartibida hujjatlar rasmiylashtirib, chora ko‘rishlik uchun JIB Paxtaobod tumani sudiga yuborilgan.
