Zelenskiy AQSH Kongressida nimalar dedi?
Ukraina prezidenti kecha Amerikaga tashrif buyurgandi.
Ukraina Amerika askarlarining Ukraina uchun jang qilishini so‘ramayapti. Bu haqda Vladimir Zelenskiy AQSH Kongressidagi chiqishida maʼlum qildi.
Ukraina prezidenti uning askarlari Amerika tanklari va samolyotlarini juda yaxshi boshqarishga qodirligini aytgan.
"Amerikalik askarlarning bizni o‘rnimizga jang qilishini so‘ramayapmiz. Men ukrainaliklar sizning tank va samolyotlaringizni o‘ta yaxshi boshqara olishiga ishontirmoqchiman", — degan u.
Bundan tashqari, janob Zelenskiy Rossiyadan tinchlik kutish noto‘g‘ri ekani va ukrainaliklar uchun eng katta yangi yil sovg‘asi g‘alaba ekanini taʼkidlagan. Prezidentning fikricha, amerikaliklar taqdim etayotgan harbiy yordam paketi bu xayriya emas, balki global xavfsizlik arxitekturasiga kiritilayotgan investitsiyadir.
Shuningdek, Ukraina yetakchisi global integratsiya tufayli Vashington harbiy mojaroni inkor qila olmasligini aytgan.
Eslatib o‘tamiz, 21 dekabr kuni Zelenskiy AQSHga tashrif buyurdi. Kongressdagi chiqishidan tashqari, u Jozef Bayden bilan uchrashgan. Uchrashuv doirasida Amerika 1,8 milliard dollarlik navbatdagi harbiy yordam paketini eʼlon qildi.
