Andijonda ichida bolalar bo‘lgan Damas ag‘darilib ketdi
Holat yuzasidan viloyat IIB maʼlumot berdi.
Bugun, 24-dekabr kuni Andijon tumanida ikkita avtomashina ishtirokida yo‘l-transport hodisasi sodir bo‘ldi. Holat yuzasidan viloyat IIB maʼlumot berdi.
To‘qnashuv soat 17:00 larda Andijon tumani hududidan o‘tgan A-373 Toshkent–O‘sh avtomobil yo‘lining 439-kilometrida yuz bergan. Cobalt rusumli avtomashina Damas avtomobilining yo‘liga chiqib yuborishi oqibatida Damas haydovchisi boshqaruvni yo‘qotgan va yo‘l chetiga ag‘darilib ketgan.
Avtomashina salonida haydovchi — 2004-yilda tug‘ilgan fuqaro A.O. bilan birga yana 4 nafar bola bo‘lgan. YTH oqibatida tan jarohati olganlar yo‘q. Yo‘lovchi bolalar ambulator ko‘rikdan o‘tkazilib, uyiga ruxsat berilgan.
Hozirda ushbu holat yuzasidan Andijon tumani IIB YHXB xodimlari tomonidan surishtiruv ishlari olib borilmoqda.
Javohirbek TURSUNOV
