AQSHda qor bo‘ronlari oqibatida 5 mingdan ortiq aviareys bekor qilindi
Hafta davomida butun mamlakatda o‘ta sovuq ob-havo hukmronlik qilmoqda, ayrim shtatlarda favqulodda holat eʼlon qilingan. yarim milliondan ortiq odam elektrsiz qolgan.
AQSHdagi qor bo‘ronlari oqibatida kamida 9 kishi halok bo‘ldi. Bu haqda SNN telekanali xabar berdi.
Uning maʼlumotlariga ko‘ra, Ogayo, Missuri, Kentukki va Kanzas shtatida noqulay ob-havo tufayli YTH holatlari ko‘paygan va bu ko‘plab odamlarning halok bo‘lishiga sabab bo‘lmoqda.
O‘tayotgan haftada Qo‘shma Shtatlarning katta qismida ob-havoning keskin sovib ketishi kuzatildi. Ko‘plab shtatlarda havo harorati rekord darajada pasaygan. Masalan, Vayomingda 41 daraja sovuq qayd etilgan.
Juma kuni qor bo‘ronlari tufayli 5.4 ming aviareys bekor qilingan. Shuningdek, butun mamlakat bo‘ylab 590 ming kishi elektrsiz qolgan.
Qator shtatlar, xususan, Jorjiya, Kentukki, Nyu-York, Oklaxoma, Shimoliy Karolina va Janubiy Dakotada favqulodda holat eʼlon qilingan.
