Rossiyami yoki Ukraina ?
Xitoy ikkisidan birini tanlashga qiynalmoqda.
Rossiyaning Ukrainaga bostirib kirishi Xitoyni “juda og‘ir ahvolga solib qo‘ydi”, chunki Pekin “do‘stlari orasidan birini tanlashni” istamaydi. Bu haqda Xitoyning Yevropa Ittifoqidagi yangi elchisi Fu Kong maʼlum qildi.
"Rossiya ham, Ukraina ham yaxshi do‘stlar, shuning uchun biz do‘stlar o‘rtasida tanlov qilishni xohlamaymiz. Bu bizning pozitsiyamizning boshlang‘ich nuqtasi.Ushbu inqiroz bizni siyosiy nuqtayi nazardan juda qiyin ahvolga solib qo‘ydi”, — dedi u.
Shu bilan birga, Fu Ukrainadagi urushni "maxsus operatsiya" deb atagan, chunki "ruslar mojaroni shunday atashgan".
Ushbu amaliyot boshlanganidan keyingi ikkinchi kuni XXR raisi Si Szinpin va Prezident Putin o‘rtasida muhim telefon suhbati bo‘lib o‘tdi va muloqot chog‘ida rais tinch yo‘l bilan yechim topish tarafdori ekanini aniq aytdi. Shundan 10 oy o‘tib, faktlar shuni ko‘rsatadiki, Xitoy Rossiyaga harbiy yordam bermayapti.
Shu bilan birga, Xitoyning Yevropa Ittifoqidagi elchisi AQSH go‘yoki qurol sotish va Yevropadagi energetika inqirozidan pul ishlash uchun "ushbu inqirozdan manfaatdor” ekanini aytdi.
"Biz bilamizki, baʼzi odamlar bu inqirozdan foyda ko‘rmoqda. Ular juda katta miqdordagi qurol-yarog‘larni sotishmoqda. Va aslida, bu inqirozning boshqa taʼsiriga kelsak, biz Yevropa davlatlari boshdan kechirgan energiya inqirozidan kim foyda ko‘rayotganini bilamiz ", — degan Fu Kong.
