Toshkentda yo‘lovchi bilan qo‘pol gaplashgan avtobus haydovchisi ishdan olindi
Holatga “Toshshahartransxizmat” izoh berdi.
Ijtimoiy tarmoqlarda Toshkent shahrida elektrobusni boshqarib ketayotgan haydovchi yo‘lovchilar bilan qo‘pol muomalada bo‘lgani aks etgan video tarqaldi. Holat yuzasidan “Toshshahartransxizmat” AJ axborot xizmati rasmiy munosabat bildirdi.
Qayd etilishicha, mazkur holat “Toshshahartransxizmat” AJning “1-avtobus saroyi” filiali tasarrufidagi 81-sonli avtobus yo‘nalishi haydovchisi B.S tomonidan sodir etilgan.
Yo‘lovchiga nisbatan muomala madaniyatiga rioya qilmaganligi va ichki tartib-qoidalarini buzganligi uchun haydovchiga nisbatan “1-avtobus saroyi” filiali rahbariyati tomonidan qat’iy chora ko‘rilib, haydovchi B.S bilan tuzilgan mehnat shartnomasi bekor qilingan.
“Barcha haydovchilar bilan yo‘lovchilarni xavfsiz tashish va ularni o‘z manzilariga sog‘-omon yetkazib qo‘yish eng oliy maqsadimiz ekanligi, yo‘lovchilar bilan xushmuomalada bo‘lishlik, xizmat ko‘rsatish madaniyatini oshirish yuzasidan yana bir bor tushuntirish ishlari olib borilib, haydovchilar ustidan nazorat kuchaytirildi”, — deyiladi xabarda.
