Farg‘onada Cobalt haydovchisi harbiy xizmatchini qasddan urib yubordi
U harbiylarning to‘xtash ishorasiga bo‘ysunmagan.
Ijtimoiy tarmoqlarda Farg‘ona viloyatida nomaʼlum shaxs harbiy xizmatchini avtomashinada urib yuborgani aks etgan video tarqaldi. Holatga viloyat prokuraturasi rasmiy munosabat bildirdi.
Maʼlum bo‘lishicha, I.M. Cobalt rusumli avtomashinasida “Toshtepa” ko‘chasida joylashgan chegara qo‘riqlash postiga yaqinlashganda ushbu postda xizmat olib borayotgan muddatli xarbiy xizmatchi D.O‘.ning to‘xtash haqidagi ishorasiga bo‘ysunmasdan, o‘tib ketgan. So‘ngra D.O‘. darhol ratsiya aloqa vositasi orqali o‘zidan 200 metr uzoqlikda xizmat vazifasini olib borayotgan harbiy xizmatchi oddiy askar A.T. Cobalt avtomashinasi uning qonuniy talabiga bo‘ysunmasdan chegara postini buzib o‘tganligi haqida xabar bergan.
Oddiy askar A.T. esa ushbu transport vositasini to‘xtatish uchun unga to‘xtash ishorasini bergan. I.M. harbiy xizmatchi A.T.ning qanday shaklda bo‘lmasin o‘zining xizmat vazifasini bajarishdan voz kechishga majbur qilish maqsadida unga qarab harakatlanib borgan va mashinaning old qismi bilan uni qasddan urib yuborgan. Shundan so‘ng u hodisa joyidan qochib yashiringan.
Oddiy askar A.T. olgan tan jarohatlari bilan shifoxonaga yotqizilgan.
Mazkur holat yuzasidan Jinoyat kodeksining 219-moddasi 2-qismi bilan jinoyat ishi qo‘zg‘atilib, I.M.ga nisbatan “qamoqqa olish” ehtiyot chorasi qo‘llangan. Hozirda dastlabki tergov harakatlari davom ettirilmoqda.
