AQSH Hind va Tinch okeani mintaqalaridagi harbiy taʼsirini yo‘qotmoqda—Politico
Osiyoning aksariyat davlatlari Pekinning ehtimoliy reaksiyasidan xavotirda.
Ayrim AQSH qonunchilari mamlakatning Hind va Tinch okeani mintaqalaridagi harbiy kuchiga shubha bilan qaramoqda. Bu haqda seshanba kuni “Politico” gazetasi yozdi.
Avvalroq Qo‘shma Shtatlar Hind va Tinch okeani mintaqalarida yirik harbiy kuchlarni joylashtirishga vaʼda bergandi.
“Bu amalga oshirilgan taqdirda Xitoy Tayvanga bostirib kirishni xayoliga ham keltirolmagan bo‘lardi”, — deyiladi xabarda.
Xususan, Mudofaa vaziri yordamchisi Eli Ratner dekabrda 2023-yil mintaqada AQSH kuchlarini joylashtirish bo‘yicha yirik o‘zgarishlar bo‘lishi mumkinligini aytgandi. Biroq AQSHning ayrim qonunchilari, shuningdek, Vashingtonning ittifoqchilari Amerika harbiy qudratini kuchaytirishga kech qolgan deb hisoblaydi.
Respublikachilardan bo‘lgan Kongress aʼzolari bu vaʼdani amalga oshirish Pentagon uchun qiyin vazifa bo‘lishini taxmin qilmoqda. Qonunchilarning taʼkidlashicha, Xitoy hozirda Hind va Tinch okeani mintaqalarida “Amerikaning uzoq yillik hukmronligiga qarshi kurashishga” qodir va yetarli darajada katta dengiz flotiga ega.
Kongress aʼzolari, shuningdek, pandemiya va Ukraina atrofidagi vaziyat sabab Tayvanga qurol-yarog‘ yetkazib qiyin bo‘lishiga ishora qilmoqda.
Politico‘ning qo‘shimcha qilishicha, Janubi-Sharqiy Osiyoning aksariyat davlatlari Pekinning ehtimoliy reaksiyasidan xavotirda. Shu sababli ular Xitoy bilan ziddiyat yuzaga kelgan taqdirda AQSHga harbiy yoki logistik yordam ko‘rsatishdan bosh tortishi mumkin.
