Endi hokimlar lavozimiga yangi tartibda tayinlanadi

 

Adliya vazirligi hokimlarni lavozimiga tayinlash va nomzodini ilgari surishni demokratik tamoyillar asosida amalga oshirishni taklif qilmoqda. Vazirlik bu borada tegishli qonun loyihasini ham ishlab chiqqan.

 

Unga ko‘ra, hokimlikka nomzodlari tegishlicha xalq deputatlari Kengashlariga saylovda eng ko‘p deputatlik o‘rinlarini olgan siyosiy partiya yoki teng miqdordagi eng ko‘p deputatlik o‘rinlarini qo‘lga kiritgan bir necha siyosiy partiya tomonidan siyosiy partiya aʼzolari orasidan taklif etiladi.Hokim nomzodi uning uchun tegishincha xalq deputatlari Kengashlari deputatlari umumiy sonining kamida uchdan ikki qismidan iborat ko‘pchiligi tomonidan ovoz berilgan taqdirda maʼqullangan hisoblanadi.Shuningdek, hokim lavozimiga nomzod aholini qiynayotgan ustuvor muammolarni hal etishga hamda cheklangan resurslardan oqilona foydalanish bo‘yicha batafsil chora-tadbirlarni amalga oshirishni nazarda tutuvchi hududni rivojlantirish bo‘yicha o‘z dasturini taqdim etadi.

 

Bundan tashqari:

Maʼqullangan nomzodlar kelgusida Prezidentga taqdim etilishi uchun Bosh vazirga taklif etiladi. 

 

Bosh vazir tomonidan maʼqullangan hokim nomzodi 7 kun muddat ichida ko‘rib chiqilib, nomzod Prezidentga taqdim etiladi yoki taqdim etish rad qilinadi.Viloyat va Toshkent shahar hokim nomzodi Prezident tomonidan o‘n kun muddat ichida ko‘rib chiqiladi va lavozimga tayinlanadi yoki tayinlash rad etiladi.Viloyat va Toshkent shahar hokimi nomzodi Prezident tomonidan rad etilgan taqdirda, yangi nomzodlarni taqdim etish ushbu moddada belgilangan tartibda amalga oshiriladi. Bunda, hokim nomzodi ikki marta Prezident tomonidan rad etilsa, ushbu moddaning birinchi–uchinchi qismlaridan belgilangan tartibda maʼqullangan nomzod xalq deputatlari Kengashi tomonidan hokim etib tayinlangan hisoblanadi.Xalq deputatlari tuman (shahar) Kengash tomonidan tuman, shahar, shaharga bo‘ysunadigan tuman va tumanlarga bo‘ysunadigan shahar hokimi nomzodi tegishincha viloyatlar, Toshkent shahar va shahar hokimiga taklif etiladi.Viloyatlar va Toshkent shahar hokimi o‘n kun muddat ichida nomzodni ko‘rib chiqadi hamda lavozimiga tayinlaydi.

 

Viloyatlar va Toshkent shahar hokimini lavozimdan ozod etish Prezidenti tomondan, tuman (shahar) hokimlarini lavozimdan ozod etish viloyatlar va Toshkent shahar hokimlari tomonidan amalga oshiriladi.

 

Hokimlarning vakolat muddati – besh yil. Amaldagi hokim o‘z vakolatlarini yangi tayinlangan hokim lavozimga kirishguniga qadar bajaradi (bundan hokimlarni lavozimdan ozod etish asoslari mustasno).Alohida hollarda, Konstitutsiyani, qonunlarni buzgan yoki o‘z shaʼni va qadr-qimmatiga dog‘ tushiradigan xatti-harakat sodir etgan hokimlarini Prezident o‘z qarori bilan lavozimidan ozod etishga haqli.