Toshkentda 2 kishini Turkiyaga fohishalikka jo‘natayotgan ayol ushlandi
Hozirda unga nisbatan jinoyat ishi qo‘zg‘atilgan.
Toshkent xalqaro aeroportida 16-dekabr kuni 2 nafar fuqaroni Turkiyaga fohishalik uchun yuborayotgan ayol qo‘lga tushdi. Bu haqda Andijon viloyati IIB xabar berdi.
Maʼlum bo‘lishicha, viloyatning Shahrixon tumanida yashovchi X.G. Andijon tumanida yashovchi E.N. va Andijon shahrida istiqomat qiluvchi M.M.larni Turkiya davlatiga fohishalik bilan shug‘ullanish uchun yuborish evaziga Turkiyada yashovchi “Oygul” ismli tanishidan 700 AQSH dollari olishga kelishgan. Kelishilgan 700 AQSH dollari hisobidan 150 AQSH dollarini olib, E.N va M.M.larni Toshkent xalqaro aeroporti orqali Turkiyaga jo‘natib yuborayotgan vaqtida tezkor tadbir ishtirokchilari tomonidan qo‘lga olingan.
Mazkur holat yuzasidan Andijon viloyati IIB huzuridagi Tergov boshqarmasi tomonidan Jinoyat Kodeksining 135-moddasi (“Odam savdosi”) 2-qismi bilan jinoyat ishi qo‘zg‘atilib, hozirda tergov harakatlari olib borilmoqda.
