Buxoroda ko‘p qavatli uy qulab tushgani aytildi
Holat yuzasidan rasmiylar izoh berdi.
Buxoro shahrining Ibn Sino yoqasidagi ko‘p qavatli qurilishi tugallanmagan binoning 7-qavatidagi beton plitalarning qulab tushdi. Holat bo‘yicha Favqulodda vaziyatlar vazirligi maʼlumot berdi.
Hodisa joriy yilning 27-dekabr kuni soat 22:55 larda yuz bergan. Holat yuzasidan zudlik bilan Buxoro shahar hokimi tomonidan maxsus ishchi guruh tuzilib, uning tarkibiga FVB, IIB, prokuratura, qurilish inspeksiyasi va boshqa tegishli tashkilotlar xodimlari jalb etilgan.
Maʼlum bo‘lishicha, bino beshinchi qavatga qadar pishiq g‘isht, oltinchi va yettinchi qavatlari gazoblok terish yo‘li bilan qurilgan. Yettinchi qavat tom yopmasi beton plitalari ostida bo‘lgan temir beton belgilangan mustahkamlikka ega bo‘lmagan to‘sin (rigelga) ortiqcha yuklanishni berilishi sababli rama konstruksiyaning to‘sin (rigel) qismida buzilish yuzaga kelgan.
Binoning asosiy qismi, oltinchi qavat temir beton regillari va beton plitalar mustahkamlik darajasini yo‘qotmagan, shu vaqtning o‘zida quruvchi tomonidan egilgan beton plitalar xavfsiz joyga tushirilib, xavf bartaraf etilgan.
Hodisa sodir bo‘lgan vaqtda binoda quruvchilar bo‘lmagan. Tan jarohati olgan va halok bo‘lganlar yo‘q. Hozirda ushbu holat yuzasidan viloyat IIB tezkor tergov guruhi tomonidan surishtiruv ishlari olib borilmoqda.
