Ohangarondagi to‘yda kelin-kuyovning do‘stlari janjallashdi
Hozirda ular jinoyat ishiga jalb etilgan.
Ijtimoiy tarmoqda Toshkent viloyatining Ohangaron tumanidagi avtomobillarga gaz quyish shoxobchasida fuqarolar o‘rtasida janjal kelib chiqqani aks etgan video tarqaldi. Holatga viloyat IIBB axborot xizmati izoh berdi.
Maʼlum qilinishicha, voqea avtomobillarga gaz quyish jarayoni yoki u yerda navbat talashgan haydovchilar bilan bog‘liq emas. Holat Ohangaron tumani “Shodmalik” mahallasida o‘tkazilgan to‘y marosimida sodir bo‘lib, xonadonga mehmon sifatida kelgan kuyovning jo‘ralari va kelinning sinfdosh do‘stlari tadbirda o‘zaro tortishib qolgan.
Shundan so‘ng ular to‘y bo‘layotgan xonadon yaqinida joylashgan, hozirgi kunda taʼmirlash ishlari sabab ish faoliyatida bo‘lmagan gaz quyish shoxobchasi hududiga o‘tib, bir-birlari bilan urishib janjallashgan.
Hozirda janjalda ishtirok etganlarning barchasi o‘rnatilgan tartibda jinoyat ishiga jalb etilib, tuman ichki ishlar bo‘limi tomonidan Jinoyat kodeksining 277-moddasi 2-qismi «b» bandi bilan jinoyat ishi qo‘zg‘atilgan. Tergov harakatlari olib borilmoqda.
