O‘zbekiston — Qozog‘iston vazirlari hamkorlik "Yo‘l xaritasi"ni imzoladi
Hujjat energetika, transport, elektrotexnika va kimyo sanoati, infratuzilmaviy qurilish, mashinasozlik, farmatsevtika, qishloq xo‘jaligi sohalarida investitsiyaviy hamda savdo hamkorligi bo‘yicha 37 ta tadbirni o‘z ichiga oladi.
O‘zbekiston va Qozog‘iston o‘ratasida investitsiya bitimlari va savdo shartnomalarini amalga oshirishga qaratilgan “Yo‘l xaritasi” imzolandi. Bu haqda Investitsiyalar va tashqi savdo vaziri Jamshid Xodjayev va Qozog‘iston Bosh vaziri Alixan Smailov o‘rtasida bo‘lib o‘tgan muzokara davomida maʼlum qilindi.
Muloqot davomida asosiy eʼtibor Qozog‘iston prezidenti Qosim-Jomart Toqayevning yaqinda O‘zbekistonga amalga oshirgan tashrifi yakunlari bo‘yicha ikki davlat rahbarlari tomonidan berilgan topshiriqlarni bajarishga qaratildi.
Uchrashuvda ikki tomonlama hamkorlikning barcha ustuvor yo‘nalishlari bo‘yicha erishilgan yirik kelishuvlarni amalga oshirish bo‘yicha “Yo‘l xaritasi” imzolandi.
Qayd etilishicha, O‘zbekiston tomonidan mazkur hujjat Bosh vazir tomonidan imzolanadi.
Shuningdek, Jamshid Xodjayev va Qozog‘iston savdo va integratsiya vaziri Serik Jumangarin investitsiya bitimlari va savdo shartnomalarini amalga oshirishga qaratilgan “Yo‘l xaritasi” yuzasidan kelishib oldi.
Hujjat energetika, transport, elektrotexnika va kimyo sanoati, infratuzilmaviy qurilish, mashinasozlik, farmatsevtika va qishloq xo‘jaligi sohalarida investitsiyaviy va savdo hamkorligi bo‘yicha 37 ta tadbirni o‘z ichiga oladi.
Yo‘l xaritasi quyidagi loyihalarni amalga oshirish bo‘yicha aniq qadamlarni nazarda tutadi:
Navoiy va Toshkent viloyatlarida fosforli va kompleks mineral o‘g‘itlar ishlab chiqarish (“Kazfosfat” MCHSH va “O‘zkimyosanoat” AK hamkorligida);
Samarqand, Toshkent va Farg‘ona viloyatlarida qurilayotgan umumiy quvvati 2 GVt gacha bo‘lgan uchta yangi ko‘mir bilan ishlaydigan issiqlik elektr stansiyalarining yoqilg‘i ehtiyojlarini uzoq muddatli (kamida 10 yil) Shubarko‘l konidagi ko‘mir bilan taʼminlash;
BI Group kompaniyasi bilan hamkorlikda Toshkent shahrida uy-joy, ijtimoiy va tijorat infratuzilmasini qurish;
“Allur kompaniyalar guruhi” AJ ishtirokida Qozog‘istonda Chevrolet Onix avtomobillarini ishlab chiqarish;
Qarag‘anda viloyatida "Artel" maishiy texnika mahsulotlarini ishlab chiqarish;
Chimkent shahrida keramik plitkalar ishlab chiqarishni tashkil etish;
erta kartoshka, go‘sht va go‘sht mahsulotlari hamda meva-sabzavotlarni yetkazib berish.
