“Humo air” xususiylashtirildi

 

“Humo air” avikompaniyasining 100 foiz davlat ulushi sotildi. Bu haqda Davlat aktivlarini boshqarish agentligi xabar berdi.

 

Tegishli xususiylashtirish dasturlariga muvofiq, Shveysariyaning Valleyroad Capital S.A. bilan “Humo air” MCHJ ustav kapitalidagi 100 foiz davlat ulushini 27,2 mlrd so‘m to‘lov hamda 2023-2026-yillarda kompaniya aviaparkini rivojlantirish va mahalliy aviaqatnovlarni oshirish majburiyati bilan sotish yuzasidan kelishuvga erishilgan.

 

Mazkur bitim doirasida Xaridor quyidagi majburiyatlarni o‘z zimmasiga olgan:

 

—2026-yilgacha kompaniya tomonidan 18 dona havo kemalarini sotib olish, shu jumladan, 3 tasini 2023-yilning birinchi yarim yilligida sotib olish va parvozlarni yo‘lga qo‘yish;

—dastlabki bosqichda ichki reyslar sonini haftasiga 16 tagacha oshirish, keyingi 5 yil davomida 60 tagacha yetkazish;

—maxsus (qishloq va xalq xo‘jaligi) aviatsiyasining xizmat ko‘rsatadigan samolyotlari parkini bosqichma-bosqich yangilash;

—aviakompaniyani boshqarishga aviatsiya sohasida ko‘p yillik tajribaga ega malakali xorijiy va mahalliy mutaxassislarni jalb qilish;

—O‘zbekiston Respublikasi rezidentlari orasidan aviakompaniya xodimlarining kamida 80 foizini shakllantirishni taʼminlash;

—yo‘nalishlarda, shu jumladan, O‘zbekiston Respublikasining boshqa aviakompaniyalari rezidentlari xizmat ko‘rsatmaydigan yo‘nalishlarda maqbul narxlarda yangi reyslarni tashkil etish.

 

“Kompaniyani xorijiy investor tomonidan yuqoridagi rivojlantirish shartlari bilan sotib olinishi fuqaro aviatsiyasi sohasiga xususiy sektorning kirib kelishi orqali raqobat muhitini rivojlantirishga, mahalliy aviaqatnovlarga bo‘lgan talabni yumshatishga va yo‘lovchilarga maqbul narxlarda aviatashuv xizmatlarini ko‘rsatishga o‘z hissasini qo‘shadi”, — deyiladi xabarda.

 

Maʼlumot uchun: Valleyroad Capital S.A. Shveysariyada 2006-yilda tashkil etilgan bo‘lib, Shveysariyada va xalqaro miqyosda yirik korxonalar va tadbirkorlarga xizmat ko‘rsatuvchi mustaqil korporativ moliyalashtirish kompaniyasi hisoblanadi. Xorijiy investor O‘zbekistondagi faoliyatini uning 100 foiz taʼsischiligidagi “Valleyroad Capital” MCHJ tomonidan amalga oshiradi.