Andijonda sotuvchi xaridorning kartasidan pul o‘mardi
Hozirda unga nisbatan jinoyat ishi ochilgan.
Andijon viloyatining Xo‘jaobod tumanida sotuvchi xaridorning bank kartasidan pul o‘g‘irladi. Bu haqda viloyat IIB xabar berdi.
Qayd etilishicha, Buloqboshi tumanida istiqomat qiluvchi 1997-yilda tug‘ilgan S.J. ariza bilan murojaat qilib, uning bank kartasidan nomaʼlum shaxs jami 2 451 000 so‘m pullarni yechib olganini bildirib, ushbu shaxsni aniqlab, qonuniy chora ko‘rishni so‘ragan.
Olib borilgan tezkor-qidiruv tadbirlari natijasida firibgarlik yo‘li bilan pullarni o‘zlashtirgan shaxs Andijon viloyati Xo‘jaobod tumanida yashovchi 1991-yilda tug‘ilgan S.A. ekanligi aniqlangan.
Do‘kon sotuvchisi bo‘lgan S.A. unga ishonib berilgan bank kartasini o‘zining mobil qurilmasiga o‘tkazgan. Karta egasidan “telefon qurilmam quvvati tugab qolgan, sizning qurilmangizdan foydalanib olay”, deb SMS-xabarnomani qo‘lga kiritish orqali pullarni o‘zlashtirgan.
S.A.ga nisbatan Jinoyat Kodeksining 168-moddasi 3-qismi bilan jinoyat ishi qo‘zg‘atilib, tergov harakatlari olib borilmoqda.
