Qozog‘istondagi ommaviy tartibsizliklarga butun 2021 yil davomida tayyorgarlik ko‘rilgani aytildi
O‘tgan yilning yanvarida mamlakatni norozilik namoyishlari qamrab olgandi. Rasmiylar bu harakatlarni davlat to‘ntarishiga urinish sifatida baholagan.
Qozog‘istondagi 2022 yil yanvar oyida bo‘lib o‘tgan ommaviy tartibsizliklarga butun 2021 yil davomida tayyorgarlik ko‘rilgan. Bu haqda respublika bosh prokurori Berik Asilov maʼlum qildi.
“Butun 2021 yil davomida radikal harakatlarni amalga oshirish uchun maxfiy tayyorgarlik olib borilgan. Tashkilotchilar orasida uyushgan jinoiy guruhlar bo‘lgan. Ular odamlar, qurollar to‘plagan, ratsiyalar va transport vositalarini sotib olgan. Tergov davomida kuch ishlatar tizimning alohida vakillari ularga yordam bergani aniqlandi”, – degan bosh prokuror parlamentning quyi palatasidagi chiqishida.
Janob Asilov yanvar voqealari davlat to‘ntarishini amalga oshirishga urinish bo‘lganini taʼkidlagan. Shuningdek, Qozog‘iston milliy xavfsizlik qo‘mitasining sobiq rahbari Karim Masimov va uning sobiq o‘rinbosari Anuar Sadikulovlarga qarshi jinoyat ishi sudga taqdim etilganini maʼlum qilgan.
2022 yil 2yanvar kuni Qozog‘istonga suyultirilgan gaz narxi oshirilishiga qarshi ommaviy norozilik namoyishlari boshlandi. Bir necha kun ichida iqtisodiy talablardan siyosiy talablarga o‘tildi va mamlakatda tartibsizliklar boshlandi.
