Baxtiyor Saidov BMT Bosh kotibining birinchi o‘rinbosari bilan Afg‘oniston masalasini muhokama qildi
Shuningdek, O‘zbekiston bilan BMT va uning ixtisoslashgan institutlari o‘rtasidagi o‘zaro hamkorlikning dolzarb masalalari yuzasidan ham fikr almashdi.
13-yanvar kuni Tashqi ishlar vaziri v.b. Baxtiyor Saidov mamlakatimizga tashrif buyurgan Birlashgan Millatlar Tashkiloti Bosh kotibining birinchi o‘rinbosari Amina Muhammad bilan uchrashdi.
Uchrashuvda O‘zbekiston bilan BMT va uning ixtisoslashgan institutlari o‘rtasidagi o‘zaro hamkorlikning dolzarb masalalari yuzasidan fikr almashildi.
A.Muhammad keyingi yillarda O‘zbekiston bilan BMT o‘rtasidagi muloqot sezilarli darajada kengayib, sifat jihatidan yangi bosqichga ko‘tarilganini taʼkidladi.
2023 yilga mo‘ljallangan qo‘shma tadbirlar jadvali va tashkiliy jihatlari, jumladan, Umumiy xavfsizlik va farovonlik yo‘lida Samarqand birdamlik forumi, Jahon turizm tashkiloti Bosh Assambleyasining 25-sessiyasi va boshqa anjumanlarni o ʼtkazish masalalari ko‘rib chiqildi.
Muloqot chog‘ida Afg‘onistondagi joriy vaziyatga alohida eʼtibor qaratildi. BMT vakillariga O‘zbekiston Prezidenti Shavkat Mirziyoyevning Afg‘oniston hukumati bilan tomonlarning majburiyatlarini bosqichma-bosqich bajarish algoritmini tayyorlash va kelishish uchun yuqori darajadagi xalqaro muzokaralar guruhini shakllantirish tashabbusining dolzarbligi haqida maʼlumot berildi.
Afg‘oniston muammosini hal etish, afg‘on xalqiga, xususan, Termizdagi xalqaro logistika xabi imkoniyatlaridan kengroq foydalanish orqali insonparvarlik yordami ko‘rsatish bo‘yicha birgalikdagi ishlarni davom ettirish bo‘yicha kelishuvga erishildi.
Muloqotda tomonlarni qiziqtirgan boshqa masalalar ham muhokama qilindi.
