Buyuk Britaniya Ukrainaga Apache vertolyotlarini berishi mumkin
Ushbu vertolyotning bir donasi 85 mln dollar turadi.
Buyuk Britaniya Ukrainaga Hellfire raketalari bilan jihozlangan Apache zarbdor vertolyotlarini yubormoqchi. Bu haqda The Mirror o‘z manbalariga tayanib xabar berdi.
Nashr suhbatdoshiga ko‘ra, Kiyev ushbu vertolyotlarni Challenger 2 tanklaridan so‘ng qabul qiladi. Tank yuborilishi haqida bundan avval Buyuk Britaniya Bosh vaziri Rishi Sunak maʼlum qilgandi.
“Apache o‘yin qoidasini o‘zgartiradi. Tanklar birinchi boradi. Vertolyotlarni ishga tushirish uchun maʼlum vaqt talab etiladi. NATOning boshqa aʼzolariga ham bu namuna bo‘ldi”, – degan manba.
Maʼlumotlarga ko‘ra, gap Apache AH64 E haqida ketmoqda, u o‘z seriyasidagi eng zamonaviy vetolyot sanaladi.
Har bir Apache 16 tagacha tankka qarshi Hellfire raketasi bilan qurollanishi mumkin. 4 ta shu kabi vertolyot 70 ta tankdan iborat butun boshli polkni yo‘q qilish imkoniyatiga ega. U Rolls Royce dvigatellari bilan jihozlangan, tezligi soatiga 300 kilometrga yetishi mumkin. Bir dona Apache 70 million funt-sterling (85,6 mln dollar) turadi.
Qayd etilishicha, ukrainalik uchuvchilar vertolyotni boshqarishni Buyuk Britaniyada o‘rganadi. Unga xizmat ko‘rsatish esa Ukraina bilan chegaradosh davlatlarda amalga oshiriladi.
