Uchuq shamollash alomatimi?

 

Oliy toifali shifokor Sevara Xusanovaning maʼlumot berishicha, gerpes yoki xalq tilida uchuq deb ataluvchi ushbu kasallik virusli infeksiya hisoblanadi.

 

Uning qo‘zg‘atuvchisi oddiy gerpes virusidir. Uchuq, asosan, og‘iz va burun atrofida kuzatiladi. Odatda infeksiya bilan inson bolalik chog‘ida to‘qnashadi. Virus odamga kasal oila aʼzosi yoki qarindoshlari orqali yuqishi mumkin.

 

Shuningdek, infeksiya bola organizmiga homila paytida tushadi. Biroq uning alomatlari onadan o‘tgan immunitet hisobiga yuzaga chiqmaydi. Vaqt o‘tib, immunitet pasaygach, yana paydo bo‘ladi.

 

Qish faslining sovuq kunlarida o‘tkir respirator infeksiyalarga chalinish oqibatida aksariyat insonlarda immunitet pasayadi. Ushbu infeksiya esa aynan tananing kurashish qobiliyati sustlashgan paytda faollashib, ko‘payadi.

 

“Shu sababli ham ko‘pchilik gerpesni shamollash alomati deb o‘ylaydi va uni davolashga yetarlicha eʼtibor qaratmaydi. Uy sharoitida o‘zboshimchalik bilan turli muolaja usullarini qo‘llashga harakat qiladi. vaholanki, surunkali davom etayotgan uchuq toshmasi organizmdagi viruslar taʼsirida yuzaga keladi. Shamollash esa shunchaki tana himoya tizimini zaiflashtiruvchi omil xolos”, — deydi mutaxassis.

 

Agar uchuq yilda bir yoki ikki marta bezovta qilsa, xavotirli emas. Ammo kasallik surunkali davom etsa, albatta, mutaxassisga murojaat qilish zarur. Shifokor lozim topsa, qondagi viruslar miqdori yoki toshmadan olingan surtma namunasiga ko‘ra tahlil o‘tkazishi mumkin. Bu orqali xastalikka qarshi maxsus muolaja buyuriladi.

 

Agar virusni davolashga yetarlicha eʼtibor berilmasa, teri, shuningdek asab tizimida jiddiy muammolar yuzaga kelishi mumkin. Shu bois uchuqning oldini olish uchun organizmni chiniqtirish, mavsumga mos kiyinish, immunitet mustahkamligiga eʼtibor qaratish zarur.