Surxondaryolik fermer sug‘oriladigan yerlarni turarjoy uchun sotib yubordi
Hozirda unga nisbatan jinoyat ishi ochilgan.
Fermer xo‘jaligiga tegishli dala yer maydonini soxta hujjatlar orqali o‘zlashtirish holati aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Departamentning Uzun tuman bo‘limi tomonidan tergovga qadar tekshiruv o‘tkazilgan. Maʼlum bo‘lishicha, “O.” fermer xo‘jaligi rahbari b.O. davlat kadastrlar palatasi tuman filiali muhandisi U.Sh. orqali xo‘jalikning 18 sotix sug‘oriladigan yer maydoni uchun soxta kadastr hujjatlarini rasmiylashtirgan va 3 nafar fuqaroga turarjoy sifatida sotgan. Shundan so‘ng yer maydonida fuqarolar tomonidan uy-joy qurish uchun beton poydevorlari qurilgan.
Mazkur holat yuzasidan Jinoyat kodeksining 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) va 229-6-moddasi (sug‘oriladigan yer uchastkasiga yoki uning bir qismiga bo‘lgan huquqni sotish yoxud qonunga xilof ravishda boshqacha tarzda o‘zga shaxsga berish) bilan jinoyat ishi qo‘zg‘atilib, tergov harakatlari o‘tkazilmoqda.
