Yana avtobuslar aholi ehtiyojini taʼminlay olmayaptimi?
Ijtimoiy tarmoqda tarqalgan xabar yuzasidan “Toshshahartransxizmat” AJ rasmiy izoh berdi.
Joriy yilning 17-yanvar kuni telegram ijtimoiy tarmog‘ida “Toshshahartransxizmat” AJning “12-avtobus saroyi” filiali tomonidan xizmat ko‘rsatilayotgan 59-sonli avtobus yo‘nalishining faoliyati yuzasidan tanqidiy video joylashtirilgan.
Mazkur holat yuzasidan AJ rasmiy izoh berdi.
«“Toshshahartransxizmat” AJning “12-avtobus saroyi” filiali tomonidan xizmat ko‘rsatilayotgan 59-sonli "Do‘stlik 2-mavzesi-Karvon bozori bekati" avtobus yo‘nalishida rejaga asosan 8 ta "SAZ LE-60" rusumli avtobuslar harakatlanishi belgilangan. Joriy yilning 17 yanvar kuni, 59-sonli avtobus yo‘nalishida rejaga asosan 8 ta "SAZ LE-60" rusumli avtobuslar yo‘nalishga to‘liq chiqarilgan bo‘lib, 12-15 daqiqa oralig‘ida harakatlangan holda yo‘lovchilarga xizmat ko‘rsatganligini maʼlum qilamiz», — deyiladi xabarda.
Qo‘shimcha qilinishicha, "Toshshahartransxizmat" AJ harakat tarkibi yangi, zamonaviy va katta sig‘imli avtobuslar bilan yangilanib bormoqda. Tez kunlarda xarid qilinayotgan katta sig‘imli avtobuslar belgilangan rejaga asosan yo‘lovchilar oqimi ko‘p bo‘lgan yo‘nalishlarda aholimizga xizmat ko‘rsatish uchun biriktiriladi.
