Samarqandda 1 mlrd kredit “uxlatildi”

 

Imtiyozli kredit mablag‘larini talon-toroj qilgan shaxslar aniqlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.

 

Qayd etilishicha, departamentning Samarqand viloyat boshqarmasi tomonidan tergovga qadar tekshiruv o‘tkazilgan. Unda, “J.A.” MCHJ rahbari K.R. hududiy tijorat banki filialidan mebel jihozlari va maishiy texnika vositalarini sotib olish uchun 1 mlrd so‘m imtiyozli kredit ajratilishiga erishib, maishiy texnika vositalarini boshqa shaxslarga naqd pulga sotib yuborib, ushbu mablag‘larni talon-toroj qilinganligi aniqlangan.

 

Departamentning Baliqchi tuman bo‘limi tomonidan o‘tkazilgan tergovga qadar tekshiruvda YATT Z.G‘. va boshqalar tijorat banki filialidan tikuvchilik dastgohlarini sotib olish uchun 245 mln so‘m imtiyozli kredit ajratilishiga erishib, ushbu mablag‘larni “A.U.” MCHJ hisob raqamiga o‘tkazish orqali naqdlashtirib olganliklari aniqlangan.

 

Departamentning Bog‘ot tuman bo‘limi tomonidan o‘tkazilgan tergovga qadar tekshiruvda esa “I.T.”, “I.Y” MCHJ rahbari V.F. va boshqalar o‘zaro til biriktirib, tijorat banki filialidan 5 nafar fuqaro nomiga ularning xabardorligisiz mototransport va boshqa asbob-uskunalar sotib olish uchun 157,8 mln so‘m imtiyozli kredit ajratilishiga erishib, ushbu mablag‘larni firibgarlik yo‘li bilan qo‘lga kiritganliklari aniqlangan.

 

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.