Samarqandda kelin-kuyovning o‘limi yuzasidan tekshiruv boshlandi
Holat bo‘yicha Bosh prokuratura qo‘shimcha maʼlumot berdi.
Avvalroq Samarqand viloyatining Kattaqo‘rg‘on tumanida kelin-kuyov is gazidan zaharlanib vafot etgani xabar qilingandi. Bosh prokuratura holat yuzasidan qo‘shimcha maʼlumot berdi.
Aniqlanishicha, 16 yanvar kuni Kattaqo‘rg‘on tumani Oltinsoy qishlog‘ida yashagan 26 yoshli erkak va uning 18 yoshli turmush o‘rtog‘i yashash xonadonida is gazidan zaharlanib vafot etgan.
Shu kuni marhumlar yaqin qarindoshlari tomonidan dafn etilgan. Biroq Kattaqo‘rg‘on tumani IIB va tibbiyot birlashmasiga ham kelin-kuyov vafot etganlari haqida xabar kelib tushmagan.
Marhumlarning yaqinlari ushbu holat haqida ichki ishlar organlari va boshqa tashkilotlarga xabar bermaganliklari aniqlangan.
Tekshirish davomida Kattaqo‘rg‘on tuman IIB, tuman hokimligi Mahalla va oilani qo‘llab quvvatlash bo‘limi, tuman Oila va xotin qizlar bo‘limi hamda «Samarqand hududgaz» korxonasiga xizmat tekshiruvlari tayinlangan.
Kattaqo‘rg‘on tuman prokuraturasi tomonidan voqea joyi ko‘zdan kechirilib, marhumlarning o‘lim sabablariga aniqlik kiritilmoqda. Tekshirish harakatlari davom etmoqda.
