Suverenitetga tahdid yo‘q — Energetika vazirligi
Kecha “Gazprom” bilan imzolangan “yo‘l xarita”siga rasmiy munosabat bildirildi.
Kecha O‘zbekiston “Gazprom” bilan energetik hamkorlik bo‘yicha “yo‘l xaritasi”ni imzolagan edi. Bu ijtimoiy tarmoqlarda keng muhokamalarga sabab bo‘ldi.
Kelishuv bo‘yicha Energetika vazirligi 1 kun o‘tib munosabat bildirdi.
“Joriy yil 24 yanvar kuni O‘zbekiston Respublikasi Energetika vazirligi va «Gazprom» kompaniyasi o‘rtasida gaz sohasida hamkorlik bo‘yicha muzokaralar o‘tkazildi va unda Rossiyadan O‘zbekistonga tabiiy gaz yetkazib berishning texnik imkoniyatlari muhokama qilindi.
Imzolangan “Yo‘l xarita”ga muvofiq tomonlar o‘rtasida tuzilgan Ishchi guruh Qozog‘iston va O‘zbekiston hududidan o‘tuvchi “O‘rta Osiyo – Markaz” gaz quvuri orqali gaz tranzitini amalga oshirish uchun zarur bo‘ladigan texnik chora-tadbirlarni va o‘rganishni kelishib olindi.
Ishchi guruh texnik jihatdan barcha ishlarni yakunlagandan so‘ng, tabiiy gazni yetkazib berish bo‘yicha asosiy shartlarni muhokama qilinadi”, — deyiladi vazirlik bayonotida.
Alohida qayd etilishicha, olib borilgan muzokaralar hamda “Yo‘l xaritasi”da O‘zbekiston Respublikasining mavjud gaz transporti tizimiga egalik huquqini to‘liq saqlagan holda ichki bozorga tabiiy gaz zarur miqdorlarda yetkazib berish maqsad qilingan. Bunda gaz transport tizimi kimgadir berilishi yoki suverenitetimizga qandaydir tahdid umuman yo‘q.
“Kelgusida ushbu yo‘nalishdagi barcha ishlar O‘zbekiston Respublikasining milliy manfaatlarini to‘liq himoya qilgan holda amalga oshirilib, natijalari yuzasidan doimiy ravishda jamoatchilikka maʼlum qilib boriladi”, — deb yakunlangan rasmiy munosabat.
