Andijonlik erkak kreditga pul bermagan ammasini pichoqlab o‘ldirdi
Shundan so‘ng u ammasining uyidagi pullarni olib ketgan.
Andijonda erkak ammasi va jiyanini pichoqlab o‘ldirdi. Holat yuzasidan Bosh prokuratura matbuot xizmati rahbari maʼlumot berdi.
Aniqlanishicha, 25 yanvar kuni soat 18:30 larda 30 yoshli erkak ammasining yashash uyida kredit qarzdorligini to‘lash uchun qarzga pul so‘ragan va ammasidan rad javobini olgan.
Rad javobidan jahli chiqqan erkak pul mablag‘larini qo‘lga kiritishni maqsad qilib, ammasi va u bilan yashovchi jiyani (amakisining qizi)ni xo‘jalik pichog‘i bilan qasddan o‘ldirgan.
Shundan so‘ng u xonadonda bo‘lgan 7 mln so‘m pulni qo‘lga kiritib, voqea joyidan yashiringan.
Olib borilgan tezkor-qidiruv tadbirlari natijasida gumonlanuvchi shaxs ushlangan. Hozirda tergov harakatlari davom etmoqda.
