Human.uz‘chilar qayerda?
Sayt rahbariyati nomaʼlum organ xodimlari tomonidan olib ketilgani aytilmoqda. Keng jamoatchilik ulardan xavotirda.
Bugun soat 10:00 atrofida Human.uz sayti direktori Xurshid Daliyev, sayt bosh muharriri Muslim Mirzajonov va saytning boshqa xodimlari o‘zini “organ xodimlari” deb tanishtirgan insonlar tomonidan Human.uz saytining Toshkent davlat agrar universiteti hududida joylashgan ofisidan olib ketilgani haqida xabar tarqalgan edi.
Unda maʼlum qilinishicha, “organ xodimlari” tomonidan ofisdagi eshiklar buzib kirilgan va ayni damda barcha maʼlumotlar, qurilmalar tintuv qilingan.
Milliy mass-mediani qo‘llab-quvvatlash va rivojlantirish jamoat fondi Human.uz internet nashri jurnalistlarining qo‘lga olinishi bilan bog‘liq vaziyatdan xavotirda ekanligini maʼlum qilgan. Huquq-tartibot idoralari tomonidan ushbu masala bo‘yicha izoh berilishini hamda jurnalistlar xavfsizligi, shuningdek, ularning professional faoliyatiga qonuniy munosabatda bo‘lish lozimligini so‘ragan.
Ayni vaqtda, Human.uz sayti tahririyati to‘satdan va ogohlantirishlarsiz olib ketilgan barcha insonlar salomatligi va holatidan qattiq qayg‘udaligini maʼlum qilgan. Ularning hech biriga aloqaga chiqishning iloji bo‘lmayapti.
