Andijonda temiryo‘l uzeli xodimi pora bilan qo‘lga tushdi
Hozirda holat yuzasidan jinoyat ishi qo‘zg‘atilgan.
Tadbirkordan 1 500 AQSH dollari talab qilgan stansiya boshlig‘i ushlandi, deya xabar bermoqda Bosh prokuratura huzuridagi iqtisodiy jinoyatlarga qarshi kurashish departamenti.
Qayd etilishicha, departament hamda DXXning Andijon viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Unda “Qo‘qon mintaqaviy temir yo‘l uzeli” UKning “Andijon-1” stansiyasi boshlig‘i M.M. “P.t.” MCHJga aholiga arzon narxlarda ko‘mir yetkazib berishda temiryo‘l xarajatlari uchun imtiyoz berilganligidan foydalanib, MCHJ ish yurituvchisi D.Z.ga go‘yoki imtiyozlardan foydalanishda ko‘maklashish evaziga 1 500 AQSH dollarini olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
