Britaniyalik ayol o‘ziga xiyonat qilgan erkakdan o‘ch oldi
Ammo u adashib boshqaning uyini yoqib yubordi.
Britaniyaning Grimsbi shahrida istiqomat qiluvchi ayol o‘ziga xiyonat qilgan erkakdan o‘ch olish maqsadida birovning uyini adashib yoqib yubordi.
Gap shundaki, 57 yoshli Jeni Enn Pekitt bor-yo‘g‘i ikki marta uchrashgan erkakni boshqasi bilan ko‘rib qolgani uchun jazolamoqchi bo‘lgan. Ayol ularning munosabatlarini jiddiy deb o‘ylagan. U g‘azablangan holda erkak yashaydigan uyning pochta qutisiga yonuvchi moddaga namlangan lattani tashladi. Maʼlum bo‘lishicha, ayol manzilda xatoga yo‘l qo‘ygan va keksa nogiron kishining kvartirasiga o‘t qo‘ygan. Uy egasi jarohatlarsiz qochishga muvaffaq bo‘lgan, biroq yong‘in natijasida mulkka katta miqdorda zarar yetgan.
Sud Pekittni olti yilga ozodlikdan mahrum qildi. Muddatidan oldin ozod qilish imkoniyati ko‘rib chiqilgunga qadar ayol jazo muddatining yarmini o‘tashi kerak bo‘ladi.
