Eronda ikki bloger ko‘chada raqs tushgan videosi uchun 10,5 yilga qamaldi
Shuningdek, blogerlar qamoq jazosini o‘tab bo‘lgach, ikki yil davomida internetdan foydalanish va Eronni tark etish huquqidan mahrum qilingan.
Astiyaj Xagigi va Amir Ahmadiy islomiy kiyinish qoidalariga zid ravishda raqsga tushgan videoni eʼlon qilgani uchun har biri 10,5 yil qamoq jazosiga hukm qilindi. Shuningdek, qamoq muddati tugagandan so‘ng ikki yil davomida ularga internetdan foydalanish va mamlakatni tark etish taqiqlandi. Bu haqda IranWire xabar berdi.
Nashrning yozishicha, sud blogerlarni "korrupsiyani rag‘batlantirish" va "mamlakat milliy xavfsizligiga putur yetkazish maqsadida fitna uyushtirish"da ayblagan. Xagigi va Ahmadiy advokat olish huquqidan mahrum qilingan, ularning garov evaziga ozod qilish haqidagi iltimoslari rad etilgan. Hukumat oilalariga ham ularning hibsga olingani haqida gapirmaslik uchun bosim o‘tkazgan bo‘lishi mumkin.
