AQSH Falastinga yana 50 million dollar bermoqchi
Oxirgi ikki yil ichida AQSHning falastinliklarga bergan moliyaviy yordamining umumiy miqdori qariyb 940 million dollarni tashkil qilgan.
Quddusda bo‘lgan AQSH davlat kotibi Oq uy hamkorlari bilan Yaqin Sharqni yana-da barqaror, xavfsiz va farovon qilish uchun ishlashga qatʼiy qaror qilganini taʼkidladi. Bu haqda AQSH Davlat departamenti matbuot xizmati maʼlum qildi.
Entoni Blinkenning Isroil hukumati aʼzolari, Falastin maʼmuriyati va Misr rahbariyati bilan uchrashuvi chog‘ida mintaqadagi keskinlikni pasaytirish va xavfsizlikni mustahkamlash uchun har bir tomon ko‘rishi mumkin bo‘lgan amaliy qadamlar haqida konstruktiv g‘oyalar muhokama qilindi.
E.Blinken nizolashayotgan tomonlarni zo‘ravonliklarning yana-da kuchayishiga yo‘l qo‘ymaslik va tinchlik o‘rnatish choralarini ko‘rishga chaqirdi.
AQSH Tashqi ishlar vazirligi rahbari joriy yilning 29 yanvar kuni Neva Yaakovdagi sinagoga yaqinida sodir etilgan terakt oqibatida halok bo‘lganlarga hamdardlik bildirdi.
AQSH BMTning Yaqin Sharqdagi falastinlik qochqinlar bo‘yicha agentligiga yana 50 million dollar ajratishini maʼlum qildi.
Bu mablag‘lar mamlakat aholisini oziq-ovqat, vaksinalar va taʼlim bilan taʼminlashga yo‘naltiriladi. Oxirgi ikki yil ichida AQSHning falastinliklarga bergan moliyaviy yordamining umumiy miqdori qariyb 940 million dollarni tashkil qilgan.
Blinken, AQSH tinchlikni mustahkamlash, falastinliklar va isroilliklar uchun teng huquq va imkoniyatlarni taʼminlashga qaratilgan barcha saʼy-harakatlarni qo‘llab-quvvatlashini bildirdi. Qayd etilishicha, prezident Bayden maʼmuriyatining siyosati ikki xalq uchun ikki davlat konsepsiyasini saqlab qolish va amalga oshirishga qaratilgan.
