Toshkentda 3 ta mashina ishtirokida YTH sodir bo‘ldi
Oqibatda bir kishi tan jarohati olib, shifoxonaga yotqizilgan.
Bugun, 2-fevral kuni Toshkent shahrining Mirobod tumanida uchta avtomashina ishtirokida yo‘l-transport hodisasi sodir bo‘ldi. Holat yuzasidan shahar IIBB YHXB maʼlumot berdi.
Hodisa soat 13:30 atrofida Mirobod tumanining Tolimarjon ko‘chasida “Elektroapparat” zavodi ro‘parasida yuz bergan. To‘qnashuv 2000 yilda tug‘ilgan K.Yu. boshqaruvida bo‘lgan Labo rusumli transport vositasi hamda 2003 yilda tug‘ilgan U.M. boshqaruvida bo‘lgan Matiz rusumli avtomashinalar ishtirokida sodir bo‘lgan.
Zarba natijasida Matiz rusumli avtomashina boshqaruvni yo‘qotib, yo‘l chetida to‘xtab turgan 1988 yilda tug‘ilgan A.K.ga tegishli Spark rusumli avtomashina bilan to‘qnashib ketgan.
Labo haydovchisi harakatlanish ustuvorligiga ega bo‘lgan Matiz rusumli avtomashina haydovchisiga yo‘l bermay, burilish manyovrini amalga oshirgani hodisaga sabab bo‘lgan.
To‘qnashuv natijasida Labo haydovchisi tan jarohati olib, shifoxonaga yotqizilgan. Mazkur holat yuzasidan tergovga qadar tekshiruv harakatlari olib borilmoqda.
