AQSH kuchli muz bo‘roni ichida qoldi
Texasda 350 mingdan ortiq odam elektrsiz qoldi. Parvozlar bekor qilingan.
Dushanba kuni boshlangan kuchli va uzoq davom etgan muz bo‘roni Texasning bir qismini konkida uchish maydonchasiga aylantirdi. Bir necha kishi ofat qurboniga aylangan, elektr taʼminotida uzilishlar kuzatilgan, minglab reyslar bekor qilingan. Bu haqda The Washington Post nashri xabar berdi.
Chorshanba kuni tushdan keyin Texasda 350 mingdan ortiq odam elektrsiz qoldi. Qurbonlar soni ortishi kutilmoqda. Chunki payshanba kuni ertalabdan bo‘ron yana-da kuchaygan. Milliy ob-havo xizmati muz bo‘roni (muzli yomg‘ir, qor va sovuq havo aralashmasi) shtat bo‘ylab harakatlanishni deyarli imkonsiz qiladi, deb ogohlantirmoqda.
Texas gubernatori Greg Ebbott seshanba kuni bo‘lib o‘tgan matbuot anjumanida:
«Shtatdagi elektr taʼminotidagi uzilishlarning ko‘pchiligi elektr uzatish liniyalarining muz bilan qoplanishi tufayli sodir bo‘lgan», — dedi.
The Washington Post xabariga ko‘ra, Texasda 13 millionga yaqin kishi muz bo‘ronidan jabr ko‘rgan: Dallas, Fort-Uort, Abilin, Midlend Odessa va San-Anjelo aholisi, shular jumlasidan. Tabiiy ofat Arkanzasdagi Hot Springs, Payn Blaff va Littl- Rock shaharlariga, shuningdek, Tennessi shtatidagi Memfis hamda Jeksonga ham taʼsir ko‘rsatdi.
