Parkentda avtokran qulashi oqibatida mashinist vafot etdi
Rasmiylar baxtsiz hodisa sabablarini maʼlum qildi.
Toshkent viloyatining Parkent tumanida avtokran qulab tushishi oqibatida mashinist vafot etdi. Holat yuzasidan “O‘zbekiston temir yo‘llari” AJ maʼlumot berdi.
Baxtsiz hodisa yukni bir nechta kranlar bilan ko‘tarish asosida amalga oshirilmaganligi sababli ro‘y bergan. Avtokranining og‘ib ketishi oqibatida mashinist tan jarohatlar va zudlik bilan Parkent tumani shifoxonasiga yotqizilgan. Og‘ir jarohatlar olganligi sababli u shifoxonada vafot etgan.
Taʼkidlanishicha, “Ko‘prikqurilish tresti”ga qarashli “13-Ko‘prikqurilish otryadi” “QYL-yo‘l ko‘prik qurilish taʼmir” MCHJ bilan shartnoma imzolagan. Ushbu hujjatda buyurtmachi tomonidan xizmat ko‘rsatuvchi xodimlarini kunlik tibbiyot ko‘rigidan o‘tkazishi va mehnat muhofazasi tadbirlarini o‘tkazish lozim bo‘lgan band alohida ko‘rsatib o‘tilgan. MCHJ tomonidan shartnoma bandlariga rioya qilinmagani, yaʼni muntazam ravishda xavfsizlik choralarini ko‘rmaganligi sababli ushbu baxtsiz hodisa ro‘y bergan.
“Sodir bo‘lgan baxtsiz hodisa Toshkent viloyati mehnat inspeksiyasi, mutaxassislari tomonidan maxsus tekshirish o‘tkaziladi va ularning xulosalari huquq targ‘ibot organlariga taqdim etiladi”, — deyiladi xabarda.
