Toshkentda 10 ming o‘rinli parkomatlar tashkil qilinadi
Shuningdek, 25 ta ko‘chada avtobuslar uchun alohida yo‘laklar tashkil etiladi.
Toshkent shahriga 1 aprelga qadar qo‘shimcha 1 mingta avtobus olib kelinadi. Bu haqda prezident Shavkat Mirziyoyev poytaxt jamoatchilik vakillari va mutasaddilar ishtirokidagi yig‘ilishda maʼlum qildi.
Yig‘ilishda poytaxt jamoat transporti sohasida olib borilayotgan va rejalashtirilgan ishlarga to‘xtalib o‘tildi.
“Mana, bugun yangi metro stansiyalarini borib ko‘rdik. Yangi liniyada jami 7 ta stansiyalar ishga tushganidan keyin, metroda kunlik yo‘lovchilar soni 1 millionga chiqadi”, — dedi davlat rahbari.
Shaharda tirbandlikni qisqartirish, odamlarning uzog‘ini yaqin qilishga qaratilgan bu ishlar davom ettirilishi taʼkidlandi. Jumladan:
— 1 aprelga qadar qo‘shimcha 1 mingta avtobus olib kelinadi;
— 25 ta ko‘chada avtobuslar uchun alohida yo‘laklar tashkil etiladi;
— yil yakunigacha 233 ta chorrahadagi svetoforlarni yo‘lovchi oqimiga qarab boshqarish tizimi joriy qilinadi;
— 20 ta oqim yuqori ko‘chalarda xususiy sheriklik asosida jami 10 ming o‘rinli parkomatlar tashkil qilinadi;
— Chilonzor, Yunusobod va Yashnobod tumanlaridagi shaharga olib kiruvchi 6 ta metro bekati atrofida avtoturargohlar tashkil qilinib, tayyor biznes sifatida auksionga chiqariladi.
