Farg‘onada 4 qavatga mo‘ljallangan turarjoy 7 qavat qilib qurildi

 

Ijtimoiy tarmoqda Farg‘ona shahrining Registon ko‘chasida joylashgan turarjoy binosi rejaga ko‘ra to‘rt qavat emas, yetti qavat qilib qurilayotgani haqida xabarlar tarqaldi. Holat yuzasidan Qurilish va uy-joy kommunal xo‘jaligi vazirligi rasmiy munosabat bildirdi.

 

Maʼlum qilinichicha, “Registon” ko‘chasidagi bo‘sh yer maydonida to‘rt qavatli turar-joy binosi, avtoturargoh, bolalar maydonchasi qurish hamda tutash hududni obodonlashtirish va ko‘kalamzorlashtirish obyekti 2018 yil 3 dekabr kuni ro‘yxatdan o‘tgan va qurilish ishlari boshlangan, obyektda inspeksiya tomonidan doimiy nazorat ishlari olib borilgan. 

 

Turarjoy binosining loyiha hujjatlarida to‘rt qavat qurish belgilangan, amalda esa yetti qavat qilib qurilgan. Ushbu obyektning beshinchi, oltinchi, yettinchi qavatlarini qurish uchun pastki qavatlarni yuk ko‘tarish qobiliyatini o‘rganish bo‘yicha MCHJ tomonidan tayyorlangan texnik xulosaga asosan yuqori qavatlarni yengil qurilish materiallaridan bajarishga tavsiya etilgan. Lekin buyurtmachi H.Latipov va pudratchi “Ikat Vodiy” MCHJ tomonidan ushbu xulosaga asosan loyiha hujjatlari qayta to‘liq ishlab chiqilmagan, belgilangan tartibda ekspertizadan o‘tkazilmagan hamda inspeksiyaga xabarnoma yuborib ro‘yxatdan o‘tmasdan qurilish ishlari amalga oshirilgan.

 

Farg‘ona viloyat qurilish sohasida hududiy nazorat inspeksiyasi tomonidan obyekt qurilishini to‘xtatish to‘g‘risida 2022 yil 12 dekabrda yozma ko‘rsatma berilgan. Shuningdek, aniqlangan qonun buzilish holati yuzasidan 2022 yil 26 dekabr kuni maʼmuriy huquqbuzarlik to‘g‘risida bayonnoma rasmiylashtirilib, maʼmuriy sudga yuborilgan. Bugungi kunda obyektda qurilish-montaj ishlari to‘xtatilgan.