Toshkentda «novostroyka» devorlari bo‘linib ketyaptimi?

 

Ijtimoiy tarmoqda Toshkent shahrining Mirzo Ulug‘bek tumanida yangi qurilgan ko‘p qavatli uylar devori bir yilga yetmasdan bo‘linib ketgani haqida xabar tarqaldi. Holat yuzasidan Qurilish va uy-joy kommunal xo‘jaligi vazirligi rasmiy munosabat bildirdi.

 

Maʼlum qilinishicha, Mirzo Ulug‘bek tumanining Mag‘rur ko‘chasidagi uy 2017 yilda  fuqaro B.Zokirov tomonidan  o‘zi va oila aʼzolarining yashashi uchun yakka tartibdagi uy-joy sifatida qurilgan va fuqarolarga alohida kvartira sifatida o‘zboshimchalik bilan rekonstruksiya qilingan holda sotilgan. Respublika sud ekspertiza markazining xulosasida ushbu uylar bir qancha nizomlar va seysmik zonada qurilish o‘tkazish talablariga javob bermasligi aniqlanib, hozirgi kunda avariya holatida ekanligi aniqlangan.

 

B.Zokirov o‘z manfaatlarini ko‘zlagan holda fuqarolarni ishonchiga kirib, yakka tartibda foydalanish maqsadida qurilgan turarjoy binosini ko‘p kvartirali uy-joy sifatida aldov yo‘li bilan fuqarolarga sotgan. B.Z. va uning sheriklariga nisbatan 2022 yil 14 mayda Jinoyat kodeksining tegishli moddalari bilan ayblov eʼlon qilinib, “qamoqqa olish tarzidagi” ehtiyot chorasi qo‘llangan va jinoyat ishi bo‘yicha ayblov xulosasi tasdiqlangan.

 

Sudning 2022 yil 1 iyuldagi hukmiga ko‘ra, “Quyun” MCHJ rahbari B.Zokirovga 8 yil-u 2 oy muddatga ozodlikdan mahrum qilish jazosi tayinlangan.

 

“Hozirgi kunda fuqarolarga yetkazilgan zararni qoplash maqsadida sud organi tomonidan kompensatsiya pulini undirish uchun sud jarayonlari davom etmoqda”, — deyiladi xabarda.