The Guardian: Eron Rossiyaga kuchliroq dronlar yetkazib bergan
Bu bo‘yicha kelishuv o‘tgan yilning noyabrida imzolangan.
2022 yil noyabrida Eron Rossiyaga navbatdagi partiya dronlarini yetkazib bergan. Ular katta radiusli qurilmalar hisoblanadi. Bu haqda The Guardian nashri o‘z manbalariga tayanib xabar berdi.
Nashr maʼlumotlariga ko‘ra, Moskva va Tehron noyabrda yangi kelishuvga erishgan. O‘sha paytda Rossiya delegatsiyasi 6 dona Mohajer-6 dronlari hamda 12 ta Shahed 191 va 129uchuvchisiz qurilmalarini yetkazib berishni so‘ragan. Bundan avval Eron yetkazib bergan kamikadze-dronlardan farqli o‘laroq ushbu qurilmalardan ko‘p marta foydalanish mumkin — ular zarbalar bergandan keyin bazaga qaytishi mumkin.
Gazeta Rossiya mukammalroq uchuvchisiz qurilmalarga ehtiyoj sezayotganini qayd etgan. Chunki Ukraina tomoni Shahed-131 va Shahed-136 qurilmalarini urib tushirishda katta tajriba to‘plagan.
The Guardian manbalaridan biri dronlar RFga ikki yo‘nalish orqali kelganini aytgan. Ularning bir qismi Rossiya harbiy-dengiz kuchlarining Kaspiy dengizi kemalarida tashilgan bo‘lsa, qolgan qismini Eron davlat aviakompaniyasi olib kelgan. Shu bilan birga 54 instruktordan iborat eronliklar guruhi ham yuborilgan bo‘lishi ehtimoli bor.
Jo‘natilgan dronlar Isfaxondagi zavodda ishlab chiqarilgan bo‘lishi mumkin. Bu zavodda yanvar oxirida portlashlar yuz bergandi. Bu esa o‘z navbatida Rossiyaga uchuvchisiz qurilmalar yetkazib berish masalasini so‘roq ostiga qo‘yadi, chunki korxona havo hujumi oqibatida katta zarar ko‘rgan bo‘lishi mumkin.
Moskva Ukrainada Eron dronlaridan faol foydalanib kelmoqda. 2022 yil kuzida The Washington Post Rossiya o‘z hududida bu qurilmalarni ishlab chiqarishni boshlashi mumkinligini yozgandi.
