Avtosanoat rahbari tez orada avtomobilga navbat yo‘q bo‘lishini eʼlon qildi
Andijonning o‘zida bu yil 250−300 mln dollarlik to‘rtta yangi zavod qurilishi aytilmoqda.
“O‘zavtosanoat” raisi Shavkat Umurzoqov avtomobilni navbatsiz olish uchun “shapka”ni qonuniylashtirishga qarshi ekanini maʼlum qildi. Uning fikricha, navbatlar muammosini faqat ishlab chiqarishni ko‘paytirish bilan yengish mumkin. Kompaniya 2023-yilda yarim million avtomobil ishlab chiqarishni rejalashtirmoqda.
Umurzoqov qo‘shimcha pul to‘lab, avtomobilni navbatsiz olish imkoni yaratilishi, yaʼni xalq orasidagi “shapka”ni qonuniylashtirish mumkinligi borasida shunday deydi:
«Men bu taklifga qarshiman, noto‘g‘ri narsa. Bekorga ishlab chiqarishda 500 ming bilan chegaralanmaymiz demadim. Avtomashinalar navbati butun dunyoda bor. Men bu bilan uni to‘g‘ri ham demoqchimasman. Lekin bu narsa [avtomobil yetkazib berish muddatini kamaytirish]ni faqat mashina ko‘p ishlab chiqarish bilan yengamiz. O‘zimizda ishlab chiqarilayotgan mashinani tezroq olish uchun ko‘proq pul to‘lang, desak, noto‘g‘ri bo‘ladi», — dedi “O‘zavtosanoat” rahbari.
Uning aytishicha, kompaniya oldida juda ko‘p tashqi va ichki muammolar turibdi. Umurzoqov bunga misol sifatida 2018 yilda bir konteyner narxi 5 ming dollar bo‘lgani, hozir 15 ming dollargacha oshganini keltirdi.
«Mashinamizni qimmatlashyapti deymiz, lekin dollarga chaqsak, shu kungacha arzonlashdi. Shuncha soliq to‘layapmiz, loyihalarning bir so‘mini ham davlatdan olmayapmiz, o‘zimizning daromadimiz yoki rivojlanishimizni ko‘rib, pullarni tashqi moliyaviy institutlar beryapti»
«Andijonning o‘zida bu yil 250−300 mln dollarlik to‘rtta yangi zavod quradigan bo‘ldik. Bu nima beradi? Tasavvur qiling, 2016 yil 80 ming mashina chiqqan, 2017 yil 120 ming chiqqan. Bugun 330 ming chiqaryapmiz. Bu yil 400 mingdan oshiq chiqaramiz. Navbat yo‘q bo‘ladi, ishoning, faqat ozgina sabr qiling», — dedi “O‘zavtosanoat” raisi.
