“Ozodlik” ikkita jiddiy xatolikka yo‘l qo‘ygan" — Rasul Kusherbayev
Tabiat resurslari vaziriga maslahatchi “Ozodlik”ning neft va gaz konlari bo‘yicha surishtiruv haqida fikr bildirdi.
Sobiq deputat, tabiat resurslari vaziri maslahatchisi Rasul Kusherbayev Ozodlik radiosining O‘zbekiston neft va gaz konlari bo‘yicha surishtiruv yuzasidan o‘z fikrini bildirdi.
"To‘g‘risini aytaman “Ozodlik”ning O‘zbekiston neft va gaz konlari bo‘yicha surishtiruvini ko‘rganimda ancha taʼsirlandim. Nahotki, shu maʼlumotlar rost bo‘lsa, degan savol o‘ylantirdi.
Lekin O‘zbekiston rasmiylari, sohaga masʼul tashkilotlar nima derkan, deb kutdim. Agar rasmiylar bu masalada jimlik saqlasa demak bu maʼlumotlar rost, degan fikrga borardim.
Ammo kuni kecha Energetika vazirligi , “O‘zbekneftgaz” kompaniyasi tomonidan berilgan munosabatlar, jurnalist va blogerlarning fikri qolaversa, masʼul tashkilotlar tomonidan ko‘rsatilgan dalillardan shuni bildimki, nazarimda “Ozodlik” ikkita jiddiy xatolikka yo‘l qo‘ygan.
Birinchisi, O‘zbekistonning butun gaz va neft konlarini barcha huquqlar bilan 35 yilga bitta kompaniyaga berishi va 35 mlrd AQSH dollari bir shaxsga tegishli korxonaga (ERIELL, ENTER Engineering) ishlatilgan degan iddao noto‘g‘ri bo‘lib chiqdi", — yozadi u.
Kusherbayevning yozishicha, ushbu ayblovlarni ilgari surgan “Ozodlik” ijodkorlarida agar O‘zbekiston rasmiylari ko‘rsatgan dalillardan kuchli dalillar bo‘lsa buni ko‘rsatishi kerak.
Agar bunday dalil bo‘lmasa, xatoga yo‘l qo‘yilgani tan olinishi kerak. Bu ham ommaviy axborot vositalarining munosib pozitsiyasi bo‘ladi.
Taʼkidlanishicha, ikkinchidan O‘zbekiston rasmiylari bildirgan normativ hujjatlar qandaydir korxonalarning buxgalterlik hujjatlaridan ko‘ra ishonarli chiqdi. Va eng muhimi barcha kelishuvlar ro‘y rost aytildi. Surishtiruvdan avval mana shu ehtimoliy argumentlar inobatga olinishi kerak edi.
“Ozodlik”ning surishtiruvi chuqur asoslanmagan iddaolar bilan ommaga axborot tarqatishga bo‘lgan urinishga o‘xshab tuyulmoqda.
Bu ishdan maqsad nima ekanligi tushunarsizligicha qoldi.
Nima bo‘lganda ham bir shaxs yoki bir guruh emas, butun mamlakat hayoti bilan bog‘liq maʼlumot tarqatishdan oldin uning oqibati qanday bo‘lishini inobatga olgan holda, har tomonlama asosli faktlarga tayanilishi kerak.
Ayni o‘rinda ushbu material tom maʼnoda O‘zbekiston xalqini junbishga keltirishi mumkin. Asoslanmagan va ishonchsiz maʼlumotlarni xalqaro omma ixtiyoriga havola etish esa odamlarni manipulyatsiya qilish, deya baholanadi", — degan vazir maslahatchisi.
