Oqqo‘rg‘onda 4 kishi ovqatdan zaharlanib vafot etdi
Yana 3 kishi ushbu tashxis bilan shifoxonaga yotqizilgan.
Toshkent viloyatining Oqqo‘rg‘on tumanida 17-fevral kuni 4 kishi ovqatdan zaharlanib vafot etdi. Bu haqda Bosh prokuratura matbuot kotibi Hayot Shamsutdinov maʼlum qildi.
Voqea joyida Oqqo‘rg‘on tumanida yashovchi bir oilaning 3 nafar aʼzosi — 1961 yilda tug‘ilgan ayol A.Z., 1978 yilda tug‘ilgan erkak X.M. va 1982 yilda tug‘ilgan ayol S.R. vafot etgan. Shuningdek, ushbu xonadonda yashovchi 18 yoshli R.M., 20 yoshli D.M., 11 yoshli T.M. va 2 yoshli H.A. “nomaʼlum etiologik zaharlanish” tashxisi bilan tibbiyot birlashmasiga yotqizilgan. Ko‘rsatilgan tibbiy yordamlarga qaramasdan, 18 yoshli R.M. kasalxona jonlantirish bo‘limida vafot etgan.
Holat yuzasidan tayinlangan sud-tibbiyot ekspertizasining dastlabki maʼlumotnomasida fuqarolar marhumlarning o‘limi bo‘yicha sud tibbiy tashxisi “is gazidan o‘tkir zaharlanish, murda dog‘larining och pushti rangdaligi, ichki aʼzolar pushti rangga kirishi, qonning suyuq holati, ichki aʼzolarning to‘laqonligi, miya va o‘pka shishi, nomaʼlum etiologiyali ovqatdan zaharlanish” ekanligi qayd etilgan.
Hozirda tuman prokuraturasi tomonidan tergovga qadar tekshiruv o‘tkazilmoqda.
