Toshkentda ko‘p qavatli "stoyanka"lar quriladi
Bu bo‘yicha Prezident qarori qabul qilindi.
Toshkent shahrida ko‘p qavatli avtoturargohlar quriladi. Bu haqda 16-fevral kuni qabul qilingan “Jamoat transporti tizimini isloh qilish chora-tadbirlari to‘g‘risida”gi Prezident qarorida so‘z boradi.
Unga ko‘ra, Iqtisodiyot va moliya vazirligining maxsus tashkil qilinadigan davlat muassasasiga yer uchastkalarini to‘g‘ridan-to‘g‘ri ajratgan holda Davlat byudjeti hisobidan yoki davlat-xususiy sherikchilik asosida Toshkent shahrida ko‘p qavatli avtoturargohlarni qurish va ularni tayyor biznes sifatida tadbirkorlik subyektlariga avtoturargoh profilini o‘zgartirmaslik sharti bilan sotish amaliyoti joriy etiladi.
Ko‘p qavatli avtoturargohlarni o‘z tannarxining 10 foiz miqdorida boshlang‘ich qiymatda elektron onlayn-auksion savdolariga chiqarish imkoniyati taqdim etiladi.
Mazkur joylar qurilishini moliyalashtirish respublika va mahalliy byudjet daromadlarining rejadan orttirib bajarilgan qismidan teng ulushlarda amalga oshiriladi. Birinchi bosqichda transportlar oqimi to‘planuvchi manzillarda 4 ta ko‘p qavatli avtoturargohlarni qurish joylari tanlab olinadi.
