Toshkentda nomaʼlum shaxs bolani maktabdan sudrab olib ketmoqchi bo‘lgani aytildi
Holatga shahar IIBB izoh berdi.
Ijtimoiy tarmoqda Toshkent shahrining Yashnobod tumanida erkak kishi yosh bolani qo‘lidan ushlab tortganligi va bola undan qochib ketganligi aks etgan video tarqalib, turli muhokamalarga sabab bo‘lmoqda. Holat yuzasidan shahar IIBB maʼlumot berdi.
Hodisa bugun, 19 fevral kuni soat 12:35 larda Yashnobod tumani Aviasozlar-2 dahasidagi 151-sonli umumiy o‘rta taʼlim maktabida yuz bergan. Nomaʼlum shaxs shu maktab o‘quvchisi — 2011 yilda tug‘ilgan M.О.ni to‘xtatib, qo‘lidan ushlab “Shu maktabda tahsil olasanmi?” deb so‘ragan. Voyaga yetmagan M.o. ushbu shaxsni tanimaganligi sababli u bilan gaplashmasligini bildirib, qo‘yib yuborishini aytgan, so‘ng uyiga ketgan.
Bola hozirda ota-onasining yonida sog‘-salomat holatda. Holat yuzasidan Yashnobod tumani IIO FMB tomonidan tergovga qadar tekshiruv o‘tkazilmoqda. O‘rganishlar jarayonida videoda aks etgan shaxs 1994 yilda tug‘ilgan M.U. ekanligi aniqlangan.
“Tekshiruv yakuni bo‘yicha qonuniy qaror qabul qilinishi taʼminlanadi”, — deyiladi xabarda.
