Samarqanddagi mehmonxona 7 mlrdlik elektrdan noqonuniy foydalangani fosh bo‘ldi
Bu 85 mingta xonadonning bir oylik isteʼmoliga teng.
Samarqand shahrida mehmonxona tomonidan 7,6 mlrd so‘mlik elektr energiyasidan noqonuniy foydalanib kelinayotgani aniqlandi. Bu haqda Energetika vazirligi xabar berdi.
O‘tkazilgan nazorat tadbiri davomida Samarqand shahrining So‘g‘diyona mavzesida faoliyat yuritib kelayotgan “Dobusya Samarqand Aqualand” MCHJda elektr energiyasidan noqonuniy foydalanish holati aniqlangan.
Maʼlum bo‘lishicha, tadbirkorlik subyektiga tegishli mehmonxonada yashirincha o‘rnatilgan o‘chirgich orqali elektr hisoblash tizimiga tashqi taʼsir ko‘rsatilgan. Isteʼmolchiga 16,9 mln kV⋅soat hisobga olinmagan elektr energiyasi bo‘yicha 7,6 mlrd so‘m miqdorida qayta hisob-kitob ishlari amalga oshirilgan.
Ushbu hajmdagi elektr energiyasi o‘rtacha 85 mingta xonadonning bir oylik isteʼmolini tashkil qiladi.
“Qoidabuzar isteʼmolchiga nisbatan belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi. Nazorat tadbirlari davom etmoqda”, — deyiladi xabarda.
