Boris Jonson NATO bosh kotibi bo‘lish harakatida
U bu gal omadi kelishiga ishonmoqda.
Buyuk Britaniyaning sobiq bosh vaziri Boris Jonson Shimoliy Atlantika alyansi bosh kotibi lavozimiga ariza berishini maʼlum qildi.
“Qadrli do‘stlar, shunday reja borligini alohida taʼkidlamoqchiman va zaxirada shunday nomzod borligini hech kim unutmasin, bu safar omadim keladi”, — degan u.
Shu bilan birga, Jonson Italiyaning sobiq bosh vaziri Mario Dragi NATOning navbatdagi bosh kotibi lavozimiga Yevropa Ittifoqi vakilini tayinlashni taklif qilganini eslatdi.
“Men uning fikriga mutlaqo qo‘shilmayman. Menimcha, Yevropa Ittifoqidan tashqarida boshqa nomzodlar ham bor. U Yevropa Ittifoqidan bo‘lishi shart emas. Albatta, men o‘zimni nomzod deb bilaman. Bu yaxshi va muhim pozitsiya”, — deya qo‘shimcha qildi u.
Jonsonning taʼkidlashicha, NATO hozir “har doimgidek kuchli” va tez orada unga yangi aʼzolar – Shvetsiya va Finlyandiya ham qo‘shiladi.
Eslatib o‘tamiz, avvalroq Boris Jonson Britaniyani Ukrainani qiruvchi samolyotlar va tanklar bilan taʼminlashga chaqirgan edi.
