Turkiyada 600 dan ortiq odam zilzila natijasida qulagan bino sabab tergov ostida
Nurdagi shahri meri ham hibsga olingan.
Turkiya kuchli zilziladan keyin turli shaharlarda qulagan binolar bilan u yoki bu tarzda aloqador bo‘lgan 600 dan ortiq odamni tergov qilmoqda.
Ularning 182 nafari sudgacha hibsga olingan. Bular qurilish pudratchilari, binolarning egalari yoki menejerlari hisoblanadi.
Shuningdek, Gaziantep viloyatining Nurdagi shahri hokimi Okkesh Kavak ham xavfsizlik kuchlari tomonidan hibsga olingan. U bilan birga uylarning qurilishida ishtirok etgan shirkat egasi ham ushlangan.
Adliya vaziri Bekir Bo‘zdag‘ning so‘zlariga ko‘ra, hozirda tekshiruvlar davom etmoqda va ayrim hollarda bino qulagan joylarda yangi dalillarning topilishi jinoiy tergov uchun asos bo‘lib xizmat qilmoqda.
Mutaxassislarning fikricha, zilziladan so‘ng qulagan ko‘plab bino va inshootlarda sifatsiz qurilish materiallaridan foydalanilgan va davlat standartlariga javob bermagan holda qurilgan.
