Rossiya “Tolibon” bilan energetika sohasida hamkorlik qilmoqchi
Afg‘oniston RF, Pokiston va Eron bilan 1 milliard dollarlik investitsion loyihalarni amalga oshirmoqchi.
“Tolibon” va Rossiya 1 milliard dollarlik savdo ittifoqi tuzadi. Unga Eron va Pokiston ham qo‘shilishi kutilmoqda. Bu haqda “Baza” Telegram-kanali maʼlum qildi.
Qayd etilishicha, toliblar kompaniyalar konsorsiumini tuzgan. Ular investitsion reja ishlab chiqadi va energetika, infratuzilma hamda resurslarni qazib olish bilan shug‘ullanadi. Rossiyalik energetik kompaniya vakillari Afg‘oniston sanoat va savdo vaziri Nuriddin Aziziy bilan uchrashgan. Ular o‘z loyihasi taqdimotini o‘tkazgani aytilmoqda.
Rossiya tomoni ham investor, ham pudratchi sifatida turli loyihalarda ishtirok etishi ko‘zda tutilgan. Masalan, Tatariston mutaxassislari mamlakatda ko‘mir elektrostansiyalari va ko‘mirdan neft mahsulotlarini ishlab chiqarish zavodini quradi. Afg‘oniston isteʼmol qiladigan elektrining 30 foizinigina ishlab chiqaradi. Neft mahsulotlari to‘liq import qilinadi. Shu bilan birga bu yerda katta miqdorda ko‘mir qazib olinadi.
“Tolibon” ulkan rejalar tuzayotgani taʼkidlangan. Masalan, hukumat Salang dovoni orqali mamlakatning shimoliy va janubiy viloyatlarini bog‘lovchi yana bir tunnel qurishni rejalashtirgan. Bundan tashqari, ular Kobul va Hirot o‘rtasidagi asosiy avtomobil yo‘lini tiklash niyatida. Bir vaqtning o‘zida xorijiy investorlarni yana-da ko‘proq jalb qilish uchun alohida iqtisodiy zonalar yaratish maqsad qilingani aytilmoqda.
