Andijondagi mehmonxonada yong‘in chiqdi
Holat bo‘yicha viloyat FVB maʼlumot berdi.
Bugun, 1-mart kuni Andijon viloyatining Xonobod tumanidagi muhmonxonalarning birida yong‘in sodir bo‘ldi. Holat yuzasidan viloyat Favqulodda vaziyatlar boshqarmasi maʼlumot berdi.
Qayd etilishicha, soat 16:26 da Xonobod shahri “Xontog‘” MFY hududida joylashgan “Xontog‘” mehmonxonasining ikkinchi qavatida yong‘in chiqqan. Oqibatda binodagi muzqaymoq kafesining 60 kvadrat metr maydonida shift, tom qismi va jihozlar yongan.
FVB xodimlari voqea joyiga soat 16:32 da yetib borgan va 16:45 da yong‘in to‘liq o‘chirilgan. Yong‘indan binoning 50 kvadrat metr maydoni saqlab qolingan. Hozirda yong‘in sababi va zarari aniqlanmoqda.
