Andijon shahridagi ko‘p qavatli uyda yong‘in chiqdi
Viloyat hokimi voqea joyiga borib, holatni o‘z nazoratiga olgan.
Ijtimoiy tarmoqlarda Andijon shahridagi ko‘p qavatli uylarning birida yong‘in sodir bo‘lgani aks etgan video tarqaldi. Holat yuzasidan viloyat hokimligi matbuot xizmati rasmiy munosabat bildirdi.
Maʼlum qilinishicha, Andijon shahridagi birinchi kichik dahada joylashgan ko‘p qavatli uyning tomida yong‘in chiqqan. O‘t o‘chirish guruhi tomonidan holat bartaraf etilgan. Hodisa oqibatida jabrlangan yoki jarohat olganlar yo‘q.
Hozirda yetkazilgan moddiy zarar va yong‘inning sababi o‘rganilmoqda. Viloyat hokimi Shuhratbek Abdurahmonov hududda bo‘lib, holatni o‘z nazoratiga olgan.
“O‘rganishlar yakuniga ko‘ra batafsil axborot berilishini maʼlum qilamiz”, — deyiladi xabarda.
