AQSH global qarama-qarshilikka tayyormi?
Xalqaro vaziyat keskinlashgan taqdirda Qo‘shma Shtatlar ikki frontda kurash olib borishi mumkin.
AQSH Rossiya va Xitoy bilan qarama-qarshilikka tayyor emas. Bu haqda The Wall Street Journal yozmoqda.
Gazetaning qayd etishicha, bugungi kunda Qo‘shma Shtatlar yetarli darajada o‘q-dori va qurol ishlab chiqarmayapti. Bu samarali tiyib turish uchun o‘ta muhim omil hisoblanadi. Buyuk davlatlarning yangi qarama-qarshiligi davri boshlangani haqida ko‘p gapirilayotgan bo‘lsa-da, qator omillar Vashingtonning tez munosabat bildirishiga yo‘l qo‘ymayapti. Bu omillar qatoriga AQSHdagi ichki ziddiyatlar, Xitoy tahdidiga bo‘lgan turlicha qarashlar va joriy muammolarga ko‘p eʼtibor qaratish kabilar kiradi.
Bundan tashqari, Amerika oxirgi o‘n yillikda Yaqin Sharqda isyonchi va terrorchi guruhlarga qarshi kurash olib bordi. Shu yillar davomida suvosti kemalari va raketalar ishlab chiqarish qisqargan. Shtab mashg‘ulotlarida aniqlanishicha, Tayvan mojarosida AQSHning uzoq masofaga uchadigan raketalari zaxirasi bir haftada tugaydi. Qo‘shma Shtatlar tovush tezligida uchadigan qurollarni ishlab chiqarishda ham Moskva va Pekindan orqada. Shuningdek, harbiy xizmatning jozibadorligi pasaygan. Qurolli kuchlarda yildan-yilga ko‘ngillilar yetishmayapti.
Ekspertlarning taxminiga ko‘ra, xalqaro vaziyat keskinlashgan taqdirda AQSH ikki frontda — Rossiya va Xitoyga qarshi harakatlarni olib borishi kerak. Harbiy harakatlarning ehtimoliy nuqtalaridan biri sifatida Arktika mintaqasi ko‘rsatilmoqda. Bu yerda Vashington Moskvadan ortda qolayotgani qayd etilgan.
The Wall Street Journal 2030 yilga kelibgina AQSH Rossiya va Xitoyni texnologiyalar bo‘yicha ortda qoldirishini taʼkidlagan. Shu bilan birga XXR bilan Tayvan tufayli to‘qnashuv bundan oldin sodir bo‘lishi mumkinligi taxmin qilingan.
