Ukraina katta hujumga tayyorlanmoqda

 

Ukraina katta hujumga tayyorgarlik ko‘rmoqda. So‘nggi 3 oyda Pentagon urush boshidan buyon ko‘rsatgan harbiy yordamining 40 foizi mamlakatga yetib keldi.

 

Ko‘makning keskin o‘sishi 2023 yil yanvarida kuzatildi. Ukraina qurolli kuchlari qo‘mondoni Valeriy Zalujniyga ko‘ra, yetkazib berilgan qurol va texnika 6 brigadadan iborat 3 ta korpusni shakllantirishga yetadi. Jami 60 ming kishilik bo‘linmalar tashkil etish mo‘ljallanmoqda.

 

“Barchaning eʼtibori sharqdagi Baxmut shahriga qaratilgan bir vaqtda tez orada eʼtibor markaziga kutilayotgan qarshi hujum tushadi. U aprelda boshlanishi mumkin”, – deyiladi The Economist materialida.

 

OAV burilish nuqtasi sifatida 20 yanvarni ko‘rsatgan. Shu kuni Ukraina mudofaasi bo‘yicha muloqot guruhining 8-yig‘ilishida Kiyevga mart oxirigacha qurol yetkazib berishni ko‘paytirishga kelishib olingandi.

 

Yanvar oyida Baxmutga hujum kuchaytirildi. Rossiya qo‘mondonligi bu orqali Ukraina zaxiralarini shu yerga jalb qilishga harakat qilgan. Lekin general Zalujniy qopqonga tushmadi va rezerv qismlarni tayyorgarlikdan o‘tish uchun G‘arbga jo‘natdi.

 

Shu bilan birga, bahorgi hujum natijalari qanday bo‘lishi nomaʼlum — ukrain armiyasining katta qismini hamon tajribasi kam askarlar tashkil etadi. Bundan tashqari, o‘q-dori yetishmovchiligi bor. Ammo nashrning qayd etishicha, Rossiya armiyasi ham “ayanchi ahvolda”. Agar ruslar frontlardan birida hujum boshlaydigan bo‘lsa, rezervlar cho‘zilib ketadi. Bu mudofaa chizig‘ida bo‘shliqlar paydo bo‘lishiga olib keladi. Ukrainaliklar esa bu vaziyatdan ustalik bilan foydalanishi mumkin.